ہیلسنکی، فن لینڈ: دنیا کا سب سے بڑا مسافربردار بحری جہاز اب قریباً مکمل ہوچکا ہے جو 5610 مسافروں کو طویل سفر پر لے جاسکتا ہے۔ یہ جہاز اب تیار ہوچکا ہے جو ٹائٹینک سے بھی 5 گنا وسیع اور دنیا کا سب سےبڑا کروز شپ بھی ہے۔
اسے ’آئکن آف دی سیس‘ کا نام دیاگیا ہے جسے کھلے سمندروں میں آزمایا جارہا ہے۔ اس کے بعد اکتوبر میں اسے کمپنی کے حوالے کیا جائے گا۔ جانچ کے تمام مراحل سے گزرنے کے بعد توقع ہے کہ جنوری 2024 میں اس میں عام مسافر سوار ہوسکیں گے۔
دولاکھ پچاس ہزار ٹن وزنی اور 1200 فٹ طویل کروزشپ کو اب تک سمندروں میں سینکڑوں میل تک ٹیسٹ کیا گیا ہے۔ اس کے انجن، بریک، شور کم کرنے کے نظام، تھرتھراہٹ اور اسٹیرنگ کو ہرطریقے سے جانچا جارہا ہے۔ پوری ٹیم اسے محفوظ بنانے پر خصوصی توجہ دے رہی ہے۔
اس میں ایک واٹرپارک، پھسلیاں اور سات شاندار سوئمنگ پول بھی موجود ہیں۔ تاہم اسٹاف کی تعداد کچھ زیادہ ہے جو 2350 نفوس پر مشتمل ہے۔ یہی وجہ ہے کہ یہ دنیا کا سب سے بڑا مسافربردار بحری جہاز بھی ہے۔
اسے فن لینڈ کی ایک کمپنی نے تعمیرکیا ہے۔
